នៅក្នុងខែមិថុនានេះ កម្មវិធី Startup Journey សូមណែនាំអ្នកទាំងអស់គ្នាមកជួបក្រុមធុរកិច្ចថ្មីធុរកិច្ចថ្មីមួយដែលបានបង្កើតឡើងជាសហគមន៍អនឡាញមួយជជែកអំពីហិរញ្ញវត្ថុផ្ទាល់ខ្លួន ក៏ជាផ្ដល់ជូននូវការបញ្រ្ជាបចំណេះដឹងផ្នែកហិរញ្ញវត្ថុ និងបរិយាប័ន្នហិរញ្ញវត្ថុទៅដល់ប្រជាជនកម្ពុជា។ ចង់ដឹងថាក្រុមធុរកិច្ចថ្មីនោះជានរណា, បង្កើតធុរកិច្ចថ្មីមួយនេះដោយរបៀបណា? តោះទៅអានអត្ថបទខាងក្រោមទាំងអស់គ្នា៖

អំពី ”CamboFinance”

“CamboFinance” គឺជាសហគមន៍អនឡាញមួយដែលធ្វើការលើផ្នែកហិរញ្ញវត្ថុផ្ទាល់ខ្លួន ក៏ជាផ្ដល់ជូននូវការបញ្រ្ជាបចំណេះដឹងហិរញ្ញវត្ថុ និងបរិយាប័ន្នហិរញ្ញវត្ថុដល់ប្រជាជនកម្ពុជា តាមរយៈមាតិកាឌីជីថលនៅលើបណ្ដាញសង្គម និងថ្នាលឌីជីថលរបស់ពួកគេ។ ធុរកិច្ចថ្មីមួយនេះត្រូវបានបង្កើតឡើងនៅក្នុងឆ្នាំ ២០១៩ និងបានចុះបញ្ជីនៅក្រសួងពាណិជ្ជកម្មក្នុងឆ្នាំ ២០២១។

បេសកម្ម និងចក្ខុវិស័យ

CamboFinance ជាធុរកិច្ចថ្មីដែលកំពុងធ្វើការលើវិស័យបច្ចេកវិទ្យាហិរញ្ញវត្ថុ និងការអប់រំផ្នែកហិរញ្ញវត្ថុដែលមានចក្ខុវិស័យចង់ឃើញប្រជាជនកម្ពុជាអាចធ្វើការស្វែងរក, ធ្វើការចាយវាយ, សន្សំ និងវិនិយោគហិរញ្ញវត្ថុរបស់ពួកគេប្រកបដោយភាពឆ្លាតវៃ។

ស្ថាបនិក និងសហស្ថាបនិក៖

លោក ប៊ូ វង្សធារ
លោក JD Lee (ជនជាតិសិង្ហបុរី)
លោក Kenny Goh (ជនជាតិសិង្ហបុរី)

ការបង្កើតធុរកិច្ចថ្មី “CamboFinance”

ផ្ដើមពីបម្រើការនៅក្រុមហ៊ុនអន្តរជាតិចំនួន ២ បូកផ្សំជាមួយជំនាញដែលខ្លួនកំពុងសិក្សានៅសាកលវិទ្យាល័យស្រាប់, ស្ថាបនិកនៃធុរកិច្ចថ្មី CamboFinance, លោក ប៊ូ វង្សធារ បានបង្កើតធុរកិច្ចថ្មីនេះឡើងជាមួយសហស្ថាបនិក ២ រូបផ្សេងទៀត ដែលជាជនជាតិសិង្ហបុរី។ នៅក្នុងឆ្នាំ២០១៩ លោក ប៊ូ វង្សធារបានស្គាល់បុរសជនជាតិសង្ហបុរីម្នាក់ឈ្មោះ JD Lee ដែលខណៈនោះរូបលោកកំពុងបម្រើការងារជាមួយលោក JD Lee ទៅលើការសិក្សាទីផ្សារ និងការធ្វើតេស្តផលិតផល ឬសេវាកម្មហិរញ្ញវត្ថុមួយចំនួនក្នុងប្រទេសកម្ពុជា។ ជាមួយគ្នានេះដែរ លោក Kenny Goh ត្រូវបានណែនាំតាមរយៈលោក JD Lee ទៅកាន់លោក ប៊ូ វង្សធារ និងជាពេលវេលាដែលរូបលោកទាំង ៣ បានចាប់ផ្ដើមធ្វើការជាមួយគ្នា។

ដើមឡើយ CamboFinance មិនមែនជាអ្វីដែលពួកគេចង់ចាប់ផ្ដើមនៅគ្រាដំបូងឡើយ ផ្ទុយទៅវិញទៅពួកគេទាំង ៣រូប បានធ្វើតេស្តទៅលើគម្រូអាជីវកម្មចំនួន ៣ រួមមានដូចជា៖ តុងទីន, Advance Cash សម្រាប់បុគ្គលិក, និងកម្មវិធីផ្ញើវិក័យប័ត្រដើម្បីទទួលបានរង្វាន់ជាដើម។ គំនិតអាជីវកម្មទាំង ៣នោះ ហាក់បីជាមិនទទួលបានលទ្ធផលល្អដូចការរំពឹងទុកនោះទេ ក្រោយពីបានសិក្សា និងធ្វើតេស្តនៅលើទីផ្សាររួចមក រហូតបានធ្វើឱ្យស្ថាបនិក និងសហស្ថាបនិកផ្សេងទៀតបានបន្តសិក្សាបន្ថែម និងរកឃើញថាបញ្ហាដ៏ធំនោះគឺ ប្រជាជនកម្ពុជាមានការយល់ដឹងពីចំណេះដឹងហិរញ្ញវត្ថុនៅមានកម្រិត មិនសូវមានទំនុកចិត្តទៅលើធុរកិច្ចថ្មីដែលធ្វើការលើវិស័យបច្ចេកវិទ្យាហិរញ្ញវត្ថុនៅឡើយទេ។ បញ្ហានេះហើយបានជំរុញឱ្យស្ថាបនិក ក៏ដូចជាសហស្ថាបនិកទាំងបីបានចាប់ផ្ដើមបង្កើតឡើងជាសហគមន៍អនឡាញមួយដើម្បីចូលរួមបណ្ដុះ និងពង្រីកចំណេះដឹងផ្នែកហិរញ្ញវត្ថុទៅដល់ប្រជាជនកម្ពុជា។ ពេលនោះហើយ, ជាពេលដែល CamboFinance ត្រូវបានបង្កើតឡើង។

ដោយឡែក, ឈ្មោះរបស់ធុរកិច្ចថ្មីមួយនេះ ត្រូវបានបង្កើតឡើងដោយពាក្យពីរផ្សេងគ្នា ដោយ Cambo មកពីពាក្យ Cambodia ឬសំដៅដល់ប្រជាជនកម្ពុជា និងពាក្យ Finance មានន័យសំដៅដល់ហិរញ្ញវត្ថុ (កម្ចី សន្សំ និងវិនិយោគ)។ ជារួមមក CamboFinance គឺជាអ្វីមួយដែលប្រជាជនកម្ពុជាអាចសិក្សា ស្វែងយល់ និងប្រើប្រាស់ ផលិតផល ឬសេវាកម្មហិរញ្ញវត្ថុនានា ដែលមានដូចជាកម្ចី សន្សំ និងវិនិយោគ។

មកដល់បច្ចុប្បន្ននេះ CamboFinance មានក្រុមការងារទាំងអស់ ៨នាក់ ដែលធ្វើការលើការបង្កើតជាមតិការឌីជីថលទាក់ទិននឹងហិរញ្ញវត្ថុ ខណៈស្ថាបនិក និងសហស្ថាបនិកធ្វើការលើការអភិវឌ្ឍនូវគម្រូអាជីវកម្ម, បច្ចេកវិទ្យា, និងទំនាក់ទំនងជាមួយដៃគូរពាក់ព័ន្ធនៅក្នុងប្រព័ន្ធអេកូឡូស៊ីរបស់ពួកគេ។

ក្រលេកទៅមើលដំណាក់កាលនៃការបង្កើតដំបូងនៃធុរកិច្ចថ្មីនេះវិញ, លោក ប៊ូ វង្សធារបានចែករំលែកពីភាពលំបាកខ្លះៗ តួយ៉ាងដោយសារគំនិតអាជីវកម្មនេះមានសភាពថ្មីនៅក្នុងទីផ្សារក្នុងប្រទេសកម្ពុជា និងមានភាពលំបាកក្នុងការស្វែងរក ក៏ដូចជាពន្យល់ពីគម្រូអាជីវកម្មរបស់ខ្លួនទៅកាន់ដៃគូរ ខណៈដៃគូរភាគច្រើនជាសាជីវកម្ម ឬក្រុមហ៊ុនធំៗ។ ការពន្យល់ ឬណែនាំអំពីខ្លួនឯងទៅកាន់ដៃគូរត្រូវចំណាយពេលវេលាច្រើន ក៏ដូចជាទំនុកចិត្តខ្ពស់ផងដែរ។ កត្តាប្រឈមដ៏ធំបំផុតមួយទៀតដែលស្ថាបនិកនៃធុរកិច្ចថ្មីនេះបានលើកឡើងនោះគឺ ទាក់ទងនឹងបញ្ហាផ្លូវច្បាប់ ដែលទាមទារការយកចិត្តទុកដាក់ខ្ពស់ផងដែរ។ ដោយធ្លាប់ជាបុគ្គលិកបម្រើការនៅក្នុងក្រុមហ៊ុនអន្តរជាតិធំៗចំនួនពីរ ពោលគឺ Uber និង Grab, លោក វង្សធារ មិនស្ដាយនឹងការចាក់ចេញពីក្រុមហ៊ុនធំៗទាំងនោះ ដើម្បីមកប្រលោកនៅក្នុងវិស័យហិរញ្ញវត្ថុដែលខ្លួនស្រលាញ់ តាមរយៈការបង្កើតនូវដំណោះស្រាយមួយដែលលោកជឿថា ប្រជាជនកម្ពុជាគួរស្វែងយល់បន្ថែម និងមានតម្រូវការ។ ក្នុងរយៈមួយឆ្នាំដំបូងដដែរនេះ ស្ថាបនិកនៃធុរកិច្ចថ្មីនេះធ្លាប់មានអារម្មណ៍ចង់បោះបង់ចោលនូវធុរកិច្ចថ្មីមួយនេះ និងត្រលប់ទៅបម្រើការងារនៅស្ថាប័នឯកជនវិញ ដោយសារលោកសឹងតែធ្វើកិច្ចការទាំងអស់តែម្នាក់ឯង រាប់តាំងពីការស្រាវជ្រាវ ការសរសេរអត្ថបទ ការផ្សព្វផ្សាយ ការសរសេរគម្រូអាជីវកម្ម និងការចេញទៅជួបដៃគូរជាដើម ដោយមិនមានក្រុមការងារគ្រប់គ្រាន់ដើម្បីជួយជ្រោមជ្រែង ជាពិសេសបញ្ហាថវិការដែលត្រូវចំណាយលើប្រតិបត្តិការនៃធុរកិច្ចថ្មីមួយនេះ។ តែអ្វីដែលធ្វើឱ្យរូបលោក មានទំនុកចិត្តនៅលើការបង្កើតធុរកិច្ចថ្មីនេះឡើង ដោយសារលោកជឿជាក់លោកមានដៃគូរល្អម្នាក់ ក៏ដូចជាមានទំនុកចិត្តលើបទពិសោធន៍ដែលលោកធ្លាប់បម្រើការងារនៅក្នុងស្ថាប័នអន្តរជាតិធំៗកន្លងមក។

តាមរយៈការចូលរួមអភិវឌ្ឍនូវធុរកិច្ចថ្មីនេះជាង ៣ឆ្នាំមកនេះ, លោក វង្សធារ យល់ថាកំហុសដ៏ធំមួយរបស់លោកក្នុងកាកសាងធុរកិច្ចថ្មីនេះគឺ ការពន្យាពេល ដោយលោកអះអាងថាឱកាសតាមពិតបានផ្ដល់ឱ្យរូបលោកច្រើន ប៉ុន្តែលោកបានពន្យាពេលក្នុងការចាប់យកឱកាសទាំងនោះ ដែលបានរុញច្រាញឱ្យរូបលោកបានបាត់បង់ឱកាសទាំងនោះដូចគ្នា។

ឆ្លើយតបនឹងកម្មវិធី Startup Journey ថាអ្វីជាភាពខ្លាំងរបស់ក្រុមធុរកិច្ចថ្មីមួយនេះ, ស្ថាបនិកធុរកិច្ចថ្មីនេះបានលើកឡើងពីការកសាងមូលដ្ឋានគ្រឹះនៃអតិថិជន ក៏ដូចជាការកសាងទំនុកចិត្តចំពោះអតិថិជន។ បន្ថែមពីនេះ, ភាពទៀងទាត់នៃការសរសេរ ឬបង្កើតមាតិកាឱ្យបានជាក់លាក់ក៏ជាការកសាងទំនុកចិត្តមួយផងដែរ។ ជាក់ស្ដែងពួកគេត្រូវធានាយ៉ាងណាដើម្បីបង្កើត និងផ្សព្វផ្សាយឱ្យបានយ៉ាងតិច ២ អត្ថបទក្នុងមួយថ្ងៃ ដែលទាំងនេះបានបងា្ហញពីភាពទៀងទាត់ និងធ្វើឱ្យដៃគូរ ក៏ដូចជាអ្នកតាមដានរបស់ CamboFinance មានសន្ទុះកើនឡើងពីមួយថ្ងៃទៅមួយថ្ងៃ។

ដើម្បីពង្រឹងខ្លួននៅក្នុងវិថីធុរកិច្ចថ្មី ស្ថាបនិកនៃធុរកិច្ចថ្មីនេះក៏បានចូលរួមវគ្គបណ្ដុះបណ្ដាល និងពន្លឿនអាជីវកម្មទាំងក្នុងស្រុក និងក្រៅស្រុក រួមមាន៖

1. Young Founder Program based in Germany

2. FYT 101 based in Cambodia

និងថ្មីៗនេះ ក្រុមធុរកិច្ចថ្មីមួយនេះក៏បានចូលរួមនៅក្នុងកម្មវិធីពន្លឿនអាជីវកម្មថ្នាលឌីជីថល ដែលរៀបចំដោយ មជ្ឈមណ្ឌលបណ្ដុះធុរកិច្ចថ្មី “តេជោ” បានជាប់ទៅកាន់វគ្គ Accelerator ដោយជោគជ័យក្រោយពីបានជាប់ Final Pitch នៃ វគ្គ Incubator ។

អំពីសេវាកម្ម “CamboFinance”

ធុរកិច្ចថ្មីនេះកំពុងផ្ដល់សេវាកម្មដោយផ្ដោតលើគម្រូអាជីវកម្មចំនួន ២៖

ទី១ ធុរកិច្ចថ្មីមួយនេះផ្ដោតលើគម្រូអាជីវកម្ម B2B ដែលធ្វើការសហការណ៍ជាមួយដៃគូរស្ថិតនៅក្នុងវិស័យហិរញ្ញវត្ថុមានដូចជា ធនាគារ, គ្រឹះស្ថានហិរញ្ញវត្ថុ និងក្រុមហ៊ុនធានារ៉ាបរង តាមរយៈការផ្សព្វផ្សាយសេវាកម្មរបស់ដៃគូរទាំងអស់មកកាន់អតិថិជន CamboFinance។
ទី២ ធុរកិច្ចថ្មីមួយនេះបានផ្ដល់ជូនគឺ អ្នកប្រើប្រាស់អាចស្វែងរកសេវាកម្មហិរញ្ញវត្ថុ ក៏ដូចជាព័ត៍មានស្ដីពីកម្ចី ការវិនិយោគ ឬធានារ៉ាប់រងជាដើម នៅលើថ្នាលឌីជីថលរបស់ពួកគេបាន។

អតិថិជនដែលធុរកិច្ចថ្មីមួយនេះកំពុងផ្ដោតគឺ ក្រុមមនុស្សដែលមានអាយុនៅចម្លោះ ១៨ទៅ ៣៥ ឆ្នាំ ដោយសារស្ថិតនៅចម្លោះវ័យនេះ ស្ថាបនិកធុរកិច្ចថ្មីមួយនេះជឿជាក់ថាពួកគេអាចស្វែងរកការងារ និងជាវ័យដែលមានទំនោរខ្ពស់ក្នុងការសម្រេចចិត្តផ្នែកហិរញ្ញវត្ថុមិនថាចាប់ផ្ដើមពីការបើកគណនីធនាគារដំបូង ការចាប់ផ្ដើមមានគណនីសន្សំ ឬការទិញធានារ៉ាប់រងជាដើម។ អ្វីដែលធុរកិច្ចថ្មីនេះបានផ្ដល់នោះគឺតាមរយៈការរៀបចំជាមគ្គុទ្ទេសក៍, ជាមាតិកា និងជាបណ្ដុំធនធានផ្សេងៗដែលអតិថិជន អាចស្វែងយល់អំពីផលិតផលហិរញ្ញវត្ថុទាំងអស់នោះ និងអាចចូលទៅប្រើប្រាស់ប្រកបដោយភាពងាយស្រួលផងដែរ។

បច្ចុប្បន្ននេះ ធុរកិច្ចថ្មីមួយនេះបានកំពុងអភិវឌ្ឍកម្មវិធីទូរស័ព្ទដៃដែលដាក់ដំណើរការនៅលើ Playstore ឬ AppStore និងគ្រោងដាក់ឱ្យដំណើរការពេញលេញនៅចុងឆ្នាំនេះ។ យ៉ាងណាមិញ អ្នកទាំងអស់គ្នាអាចចូលទៅប្រើប្រាស់ ឬស្វែងរកព័ត៍មានលំអិតស្ដីពីផលិតផលឬសេវាកម្មហិរញ្ញវត្ថុផ្សេងៗ ក៏ដូចជាសិក្សាស្វែងយល់ពីចំណេះដឹងទូទៅលើផ្នែកហិរញ្ញវត្ថុនៅលើថ្នាលរបស់ពួកគេបាន។

គួរបញ្ជាក់ដែរថា មកដល់នេះ CamboFinance មានអ្នកតាមដានជាង ១ សែននាក់នៅលើបណ្ដាញសង្គមនានា។

ផែនការអនាគត

ក្នុងរយៈពេល ៥ឆ្នាំខាងមុខ CamboFinance មានក្ដីស្រមៃចង់ពង្រីកនូវប្រតិបត្តិការរបស់ខ្លួនទៅកាន់អន្តរជាតិបន្ថែមទៀត ជាពិសេសប្រទេសជិតខាងដូចជាប្រទេសថៃ ប្រទេសវៀតណាម ឬសង្ហបុរីជាដើម បន្ទាប់ពីមានប្រតិបត្តិការល្អនៅក្នុងប្រទេសកម្ពុជា។

មតិផ្ដាំផ្ញើ

សម្រាប់ស្ថាបនិកនៃធុរកិច្ចថ្មីនេះ ពេលវេលាដ៏ល្អសម្រាប់ចាប់ផ្ដើមបង្កើតធុរកិច្ចថ្មីគឺនៅពេលដែលបុគ្គលនោះមានបទពិសោធន៍គ្រប់គ្រាន់ មានក្រុមការងារល្អ និងមានទំនុកចិត្តក្នុងការកៀកររកជំនួយជាហិរញ្ញវត្ថុសម្រាប់ប្រតិបត្តិការ។ បន្ថែមលើនេះ, លោកក៏បានចែករំលែកនូវគន្លឹះ ២ សំខាន់ៗសម្រាប់ស្ថាបនិកដទៃ ឬអ្នកដែលទើបតែប្រលោកនៅក្នុងវិស័យធុរកិច្ចថ្មីនេះ រួមមាន៖

ការកសាងបណ្ដាញទំនាក់ទំនង
ការសិក្សាស្វែងយល់បន្ថែម។

សូមតាមដានការចេញផ្សាយវីដេអូ Startup Journey ស្ដីពី CamboFinance នៅលើទំព័រហ្វេសបុក មជ្ឈមណ្ឌលបណ្ដុះធុរកិច្ចថ្មី “តេជោ” ដើម្បីស្វែងយល់បន្ថែមពីការចែករំលែកពីដំណើររឿងនៃការបង្កើតធុរកិច្ចថ្មីនេះ ក៏ដូចជាបទពិសោធន៍កន្លងមក៕

ទំនាក់ទំនង

លេខទូរស័ព្ទ៖+85511 353 366

Email: contact@cambofinance.com

តាមដាន CamboFinance៖

ទំព័រ Facebook៖ https://www.facebook.com/CamboFinance

Website ៖ https://www.cambofinance.com/

សូមរង់ចាំស្ដាប់ និងទស្សនាការចែករំលែកពីបទពិសោធន៍នានារបស់ធុរកិច្ចថ្មី “CamboFinance” បន្ថែមទៀតក្នុងពេលឆាប់ៗខាងមុខនេះ ដើម្បីស្វែងយល់លម្អិតបន្ថែម និងចង់ដកស្រង់បទពិសោធន៍ថ្មី តាមរយៈហ្វេសបុកផេករបស់ Techo Startup Center និង Startup Cambodia ។