ដោយ៖ មជ្ឈមណ្ឌលបណ្ដុះធុរកិច្ចថ្មី "តេជោ"

ធុរកិច្ចថ្មី ដែលត្រូវបានគេស្គាល់ដោយសារសក្កានុពលរបស់ខ្លួន តាមរយៈការបង្កើតផលិតផល ឬសេវាកម្មថ្មីៗទៅកាន់ទីផ្សារ ដើម្បីដោះស្រាយនូវបញ្ហាស្មុគស្មាញដែលអតិថិជនជួបប្រទះ។ ធុរកិច្ចថ្មីតែងតែ យកភាពច្នៃប្រឌិត និងប្រើប្រាស់បច្ចេកវិទ្យាជាស្នូលក្នុងការអភិវឌ្ឍ ដំណោះស្រាយរបស់ខ្លួនក្នុងការធ្វើឱ្យប្រសើរឡើងនូវជីវិតរស់នៅប្រចាំថ្ងៃរបស់អតិថិជន។ នៅថ្ងៃនេះ Startup Journey សូមណែនាំអ្នកទាំងអស់មកស្គាល់ធុរកិច្ចថ្មី Delightech ដែលជាជ័យលាភីលេខ ១ នៅក្នុង កម្មវិធីពន្លឿនអាជីវកម្មសហគ្រាសធុនតូច និងមធ្យមឌីជីថល, ដែលផ្ដោតលើដំណោះស្រាយលើវិស័យហិរញ្ញវត្ថុតាមរយៈការផ្ដល់កម្ចីទៅកាន់អតិថិជនដែលពិបាកទទួលសេវាពីគ្រឹះស្ថានផ្ដល់ហិរញ្ញវត្ថុដូចជាធនាគារជាដើម។

អំពី Delightech

ជាមួយមហិច្ចតា និងការខិតខំប្រឹងប្រែង បូកផ្សំជាមួយពិសោធន៍ផ្នែកហិរញ្ញវត្ថុរួមបញ្ចូលគ្នាជាង ៥០ឆ្នាំ របស់សហស្ថាបនិករបស់ធុរកិច្ចថ្មីនេះ, Delightech ដែលត្រូវបានបង្កើតឡើងនៅក្នុងឆ្នាំ ២០១៨ និងចុះបញ្ជីជាផ្លូវការក្នុងឆ្នាំ ២០២១ មានបេសកម្ម បញ្ជ្រាបចំណេះដឹងអំពីដំណោះស្រាយហិរញ្ញវត្ថុ ក៏ដូចជាការប្រើប្រាស់សេវាហិរញ្ញវត្ថុបែបឌីជីថល ទៅកាន់ប្រជាជនដែលពិបាកទទួលបានសេវាហិរញ្ញវត្ថុ ឬកំពុងប្រើប្រាស់សេវាហិរញ្ញវត្ថុដែលមានហានីភ័យខ្ពស់។ ជាមួយចក្ខុវិស័យ និងការជឿជាក់ ធុរកិច្ចថ្មីនេះចង់ក្លាយជាកន្លែងមួយសម្រាប់កសាងនូវប្រវត្តិឥណទានសម្រាប់អ្នកប្រើប្រាស់ និងជួយឱ្យអតិថិជនទទួលបានសេវាហិរញ្ញវត្ថុកាន់តែធំ និងប្រសើរជាងមុន។

ដំណើរនៃការបង្កើតធុរកិច្ចថ្មី Delightech និង វេទិកា “លុយលឿន”

ដោយមើលឃើញពីកំណើននៃការប្រើប្រាស់សេវាហិរញ្ញវត្ថុ ក៏ដូចជាភាពលំបាកជាច្រើនក្នុងការទទួលបានសេវាហិរញ្ញវត្ថុ ដោយត្រូវការលក្ខខណ្ឌតម្រូវជាច្រើន ខណៈពេលប្រជាជនមួយចំនួនមិនទាន់មានលក្ខណៈគ្រប់គ្រាន់ដើម្បីទទួលបានសេវាហិរញ្ញវត្ថុផ្លូវការនៅឡើយ។ បន្ថែមលើនេះ, ការចំណាយពេលវេលា ឬថវិកាក្នុងការធ្វើដំណើរទៅកាន់គ្រឹះស្ថានហិរញ្ញវត្ថុ បានបង្កជាភាពលំបាកដទៃបន្ថែមទៀត ដោយត្រូវខាតបង់ពេលវេលាក្នុងការបំពេញការងារ និងប្រកបរបរប្រចាំថ្ងៃជាដើម។ បញ្ហាចម្បងដែលបានរៀបរាប់ខាងលើ បានជំរុញឱ្យបុគ្គល ៤ រូប ដែលបានបម្រើការងារជាមួយគ្នានៅស្ថាប័នផ្តល់សេវាហិរញ្ញមួយកន្លែង រួមគ្នាបង្កើតឡើងនូវធុរកិច្ចថ្មីនេះដែលមានឈ្មោះថា Delightech និងវេទិកា “លុយលឿន” នេះឡើង។ ស្ថាបនិក និងសហស្ថាបនិកទាំង ៤ រូបនោះ រួមមាន៖ លោក ឡាយ វិឡា ជាអគ្គនាយក, លោក សៅ សារ៉ុន ជានាយកអភិវឌ្ឍន៍អាជីវកម្ម, លោក ជា ចាន់ដារា ជានាយកផ្នែកហិរញ្ញវត្ថុ, និងកញ្ញា លី ចិន្តា ជានាយកប្រតិបត្តិការ។ ចំពោះដំណើរការបង្កើត និងអភិវឌ្ឍវេទិកា “លុយលឿន” ឱ្យកាន់តែប្រសើរឡើង ក្រុមការងារស្នូលរបស់ធុរកិច្ចនេះ បានលើកឡើងពីបញ្ហាប្រឈមធំៗចំនួន ៤ ដែលខ្លួនបានជួបប្រទះ, មានជាអាទិ៍៖ កង្វះធនធានមនុស្សជំនាញផ្នែកបច្ចេកវិទ្យា, បញ្ហាដែលបង្កឡើងពីការរីករាលដាលនៃជំងឺកូវីដ-១៩, ការសហការរវាងដៃគូផ្ទេរប្រាក់, និងការអប់រំដើម្បីផ្លាស់ប្តូរឥរិយាបថនៃការប្រើប្រាស់សេវាហិរញ្ញវត្ថុបែបប្រពៃណីពីមុនរបស់អតិថិជនជាដើម។ ទោះយ៉ាងណាក៏ដោយ, ធុរកិច្ចថ្មី Delightech ដែលត្រូវគេស្គាល់ភាគច្រើនតាមរយៈ វេទិកា “លុយលឿន” មិនបានរាថយនោះឡើយចំពោះឧបសគ្គ ឬបញ្ហាប្រឈមទាំងនោះទេ, ផ្ទុយមកវិញធុរកិច្ចថ្មីមួយនេះបានរីកធំធាត់ ពីក្រុមការងារចំនួន ៤ នាក់ រហូតមកដល់ ១៦ នាក់ ក្នុងឆ្នាំ ២០២២ ដែលភាគច្រើនសុទ្ធតែយុវវ័យ ដែលធុរកិច្ចថ្មីនេះជឿថា ពោរពេញដោយសមត្ថភាព និងគំនិតច្នៃប្រឌិតខ្ពស់ ដែលអាចឆ្លើយតបទៅនឹងកំណើនអតិថិជនជារៀងរាល់ថ្ងៃ ហើយអាចរក្សាបាននូវគុណតម្លៃស្នូល ព្រមទាំងគុណភាពនៃសេវាកម្មរបស់ខ្លួន។ លើសពីនេះ, តាមរយៈកិច្ចខិតខំប្រឹងប្រែងកន្លងមក ពួកគេត្រូវបានទទួលស្គាល់ពីស្ថាប័នបណ្ដុះបណ្ដាល ជាតិ និងអន្តរជាតិជាច្រើន និងថ្មីៗនេះ ក្រុមធុរកិច្ចថ្មី Delightechនេះក៏ទទួលបានចំណាត់ថ្នាក់លេខ១ ក្នុងការប្រកួតប្រជែងនូវគំនិតអាជីវកម្ម នៅក្នុងកម្មវិធីពន្លឿនអាជីវកម្មសហគ្រាសធុនតូច និងមធ្យមឌីជីថល ឆ្នាំ២០២១ រៀបចំដោយក្រសួងសេដ្ឋកិច្ច និងហិរញ្ញវត្ថុ និងមជ្ឈមណ្ឌលបណ្ដុះធុរកិច្ចថ្មី “តេជោ” ដែលទទួលបានថវិកាជាប្រាក់រង្វាន់ដើម្បីធ្វើការពន្លឿនអាជីវកម្មរបស់ខ្លួនចំនួន ១០,០០០ ដុល្លារអាមេរិក។

អំពីសេវាកម្មហិរញ្ញវត្ថុរបស់ “លុយលឿន”

“លុយលឿន” (LuyLeun) ជាវេទិកាសេវាកម្ចីសាច់ប្រាក់បន្ទាន់ តាមប្រព័ន្ធឌីជីថល ត្រូវបានអភិវឌ្ឍឡើងដោយក្រុមធុរកិច្ចថ្មី Delightech ដែលកំពុងផ្ដល់ជូននូវដំណោះស្រាយហិរញ្ញវត្ថុតាមរយៈបច្ចេកវិទ្យាហិរញ្ញវត្ថុ (FinTech)។ វេទិកាសេវាកម្ចីសាច់ប្រាក់បន្ទាន់នេះ ត្រូវបង្កើតជាពិសេសសម្រាប់អតិថិជនដែលពិបាកទទួលបានសេវាកម្មហិរញ្ញវត្ថុ ពីសា្ថប័នផ្តល់ហិរញ្ញវត្ថុផ្លូវការដូចជា គ្រឹះស្ថានមីក្រូហិរញ្ញវត្ថុ និងធនាគារជាដើម។ ផ្ទុយពីសេវាកម្មឥណទានបែបប្រពៃណី អ្នកប្រើប្រាស់អាចធ្វើការស្នើសុំសេវាកម្ម តាមរយៈទូរស័ព្ទវៃឆ្លាតផ្ទាល់ គ្រប់ពេល និងគ្រប់ទីកន្លែង ជាមួយការទទួលបានលទ្ធផលអនុម័តដ៏រហ័ស ជាមួយការបំពេញបែបបទត្រឹមតែ ៤ ជំហានប៉ុណ្ណោះ ដើម្បីទទួលបានសាច់ប្រាក់ ទៅកាន់គណនីទទួលប្រាក់របស់អតិថិជនផ្ទាល់ ព្រមទាំងមិនតម្រូវឱ្យមានការបំពេញឯកសារនៅស្ថាប័នផ្ទាល់ ជាមួយលក្ខខណ្ឌតម្រូវស្មុគស្មាញ និងទ្រព្យបញ្ចាំ ឬអ្នកធានាឡើយ។ អតិថិជនអាចធ្វើការសងត្រលប់នូវកម្ចីជាមួយជម្រើសទូទាត់ជាច្រើន និងងាយស្រួលទៅតាមបញ្ឈរបង់ប្រាក់ដែលនៅស្ថិតនៅជិតខ្លួន។ បន្ថែមលើគុណតម្លៃនៃសេវាកម្ម សុវត្ថិភាពព័ត៌មានរបស់អតិថិជនក៏ត្រូវបានការពារយ៉ាងមុតមាំ។ ត្រលប់មកមើលពីអតិថិជនគោលដៅរបស់ក្រុមធុរកិច្ចថ្មីនេះវិញ ភាគច្រើនជាប្រភេទអ្នកប្រើប្រាស់សេវាហិរញ្ញវត្ថុដែលមិនទាន់មានលទ្ធភាពពេញលេញក្នុងការទទួលបានសេវាហិរញ្ញវត្ថុនៅតាមគ្រឹះស្ថានធនាគារ ឬគ្រឹះស្ថានមីក្រូហិរញ្ញវត្ថុ ដែលតម្រូវឱ្យបំពេញលក្ខខណ្ឌស្មុគស្មាញ និងចំណាយពេលវេលាច្រើនក្នុងការរង់ចាំដើម្បីទទួលបានលទ្ធផលអនុម័ត។ តាមរយៈបទពិសោធន៍ ព្រមជាមួយការស្គាល់ច្បាស់អំពីឥរិយាបថនៃការប្រើប្រាស់សេវាហិរញ្ញវត្ថុរបស់អតិថិជនរបស់ខ្លួន និងការឆ្លើយតបសមស្របនឹងតម្រូវការបត់បែនរបស់អតិថិជន, វេទិកា “លុយលឿន” ត្រូវបានអ្នកប្រើប្រាស់ទាញយកមកប្រើប្រាស់ប្រមាណ ៧១០០ ដង ក្នុងនោះមានអតិថិជនកំពុងប្រើប្រាស់សេវាហិរញ្ញវត្ថុរបស់ខ្លួនច្រើនជាង ៨០០នាក់ជារៀងរាល់ខែ។ គន្លឹះក្នុងការបង្កើតវេទិកា “លុយលឿន” ឱ្យទទួលបានលទ្ធផល និងការគាំទ្រជាច្រើនក្នុងរយៈពេលខ្លីពីសំណាក់អតិថិជនបែបនេះ ត្រូវបានស្ថាបនិកធុរកិច្ចមួយរូបក្នុងចំណោមសហស្ថាបនិកដទៃជឿជាក់ថា មកពីការផ្តល់សេវារហ័ស ងាយស្រួល បត់បែន និងផ្តល់សុវត្ថិភាពខ្ពស់ជូនអតិថិជន ព្រមទាំងភាពរួសរាយរាក់ទាក់ និងការផ្តល់ការប្រឹក្សាផ្សេងៗ មុនពេលអតិថិជនធ្វើការសម្រេចប្រើប្រាស់សេវាហិរញ្ញវត្ថុរបស់ខ្លួន។

ផែនការអនាគត

សម្រាប់ ៥ឆ្នាំខាងមុខ ក្រុមធុរកិច្ចថ្មីមួយនេះ ប្ដេជ្ញាបន្តបញ្រ្ចាប ក៏ដូចជាផ្តល់ចំណេះដឹង និងការប្រើប្រាស់សេវាហិរញ្ញវត្ថុបែបឌីជីថល ទៅកាន់ប្រជាជនកម្ពុជាឱ្យបានកាន់ច្រើន និងសំបូរបែបថែមទៀត។ ជាងនេះទៀតទៅ, ពួកគេនឹងបន្តចូលរួមកាត់បន្ថយអត្រាស្រ្តី ដែលមិនអាចទទួលបានសេវាហិរញ្ញវត្ថុឱ្យមានកម្រិតទាបបំផុត និងក្លាយជាផ្នែកមួយក្នុងការកសាងប្រព័ន្ធអេកូឡូស៊ីផ្នែកហិរញ្ញវត្ថុមួយឱ្យរឹងមាំសម្រាប់ប្រជាជនកម្ពុជា និងនាំយកបទពិសោធន៍នេះទៅកាន់ប្រទេសជិតខាងក្នុងតំបន់អាស៊ីអាគ្នេយ៍ទៀតផង។

ដំបូន្មានផ្ដាំផ្ញើ

មុននឹងបញ្ជប់, លោក ឡាយ វីឡា ដែលជាស្ថាបនិកនៃធុរកិច្ចនេះ បានលើកទឹកចិត្តសម្រាប់យុវជន ដែលមានគំនិតផ្តួចផ្តើមចង់បង្កើតធុរកិច្ចថ្មី ដោយធ្វើការចាប់ផ្តើមនូវជំហានដំបូងមួយរបស់ខ្លួនឥឡូវនេះ មិនថាកំពុងសិក្សាក្តី ត្រូវស្វែងរកដៃគូរដែលមានភាពជឿជាក់លើគ្នា និងត្រូវហ៊ានសាកល្បងនូវផលិតផល ឬសេវាកម្មគំរូតូចណាមួយ ដោយត្រូវហ៊ានទទួលយកនូវពិសោធន៍ទាំងនោះ រួចបន្តកែច្នៃវាឱ្យកាន់តែប្រសើរឡើង។ លើសពីនេះ, លោកក៏បានបន្ថែម ដោយមិនត្រូវខ្លាចការបរាជ័យ និងដរាបណាអ្នកនៅមានជំនឿ អ្នកត្រូវខិតខំស្វែងយល់ពីអតិថិជនគោលដៅរបស់អ្នក ដោយស្វែងយល់ពីផលលំបាករបស់អ្នកដទៃ លោកអ្នកនឹងទៅដល់គោលដៅជាក់ជាមិនខាន។

ទំនាក់ទំនង

ដើម្បីស្វែងយល់លម្អិតបន្ថែម និងចង់ដកស្រង់បទពិសោធន៍ថ្មី ឬចង់ចូលរួមជាមួយធុរកិច្ចថ្មីមួយនេះសូមទំនាក់ទំនង៖

លេខទូរស័ព្ទ៖ +85510 269 769

អ៊ីម៉ែល៖ info@luyleun.com ឬ career@luyleun.com

គេហទំព័រ៖ Delightech.asia

___________________________

សូមរង់ចាំស្ដាប់ និងទស្សនាការចែករំលែកពីបទពិសោធន៍នានារបស់ធុរកិច្ចថ្មី Delightech បន្ថែមទៀតនៅថ្ងៃទី ៣១ ខែ មករា ឆ្នាំ ២០២២ ខាងមុខនេះ តាមរយៈហ្វេសបុកផេករបស់ Startup Cambodia និង Techo Startup Center ។

Bring your startup to our Startup Journey now ! Get register !

Startup Journey នាំមកជូននូវសាវតារធុរកិច្ចថ្មីក្នុងប្រទេសកម្ពុជា